MANDAUE CITY,CEBU- Gipaambit ni Mandaue City Mayor Thadeo Jovito “Jonkie” Ouano nga kon mahuman na ang unang tulo ka andana sa bag-ong 10 ka andana nga Government Center, plano niya nga ablihan kini alang sa mga buhatan sa gobyerno ug serbisyo publiko.
Atol sa pagbisita, niabot sa 12 porsiyento ang kahumanan sa proyekto nga nahimutang sa Barangay Tipolo sulod sa compound sa kanhi Cebu International Convention Center (CICC).
Kahinumduman, ang miaging administrasyon nakakuha og P3-bilyones nga pautang gikan sa Development Bank of the Philippines aron pondohan ang pagtukod sa one-stop-shop government center.
Diin opisyal nga nagpahigayon sa ground breaking sa maong proyekto niadtong Agosto 29, 2024 isip kabahin usab sa pagselebrar sa Charter day.
Gibutyag usab ni Ouano, nga samtang wala pa mahuman ang pagtukod ang maong proyekto, mamahimo una nga ibalhin ang mga departamento ngadto sa bag-ong government center.
Dugang usab niini nga plano sa opisyal nga ipa-okupar ang unang tulo ka andana samtang gapadayun pa og trabaho sa maong edipisyo ug mamahimo usab silang magpadayon sa ilang operasyon.
Ingon man nga plano usab nga e apply ang samang paagi sa Mandaue City Hospital, sa higayon nga matukod na kini—mahimo nang magamit ang unang mga andana nga dili na maghuwat nga mahuman ang tibuok building.
Giklaro usab sa mayor nga ang 3 bilyones nga pundo gikan sa DBP loan gigahin alang lamang sa bag-ong government center.
Hinungdan nga nanghinaot ang mayor nga mahuman na ang maong proyekto sa tuig 2026. | Bombo Nathaniel Sandoval
