CENTRAL VISAYAS- Gihangop sa mga kadagkoan sa Department of Education – Central Visayas (DepEd-7) ang State of the Nation Address (SONA) ni Presidente Ferdinand “Bongbong” Marcos Jr. kagahapon sa hapon, Lunes, Hulyo 28, 2025.
Sa pakighinabi sa Bombo Radyo Cebu Newsteam, gibutyag ni Dr. Salustiano Jimenez, Regional Director sa DepEd-7, nga nagpasalamat siya nga nalakip sa mga punto sa SONA ang sektor sa edukasyon, ilabi na ang mga inisyatiba nga naghatag ug paglaum sa kaugmaon sa mga kabatan-onan.
Matud pa ni Jimenez, daghan na kaayong mga tinun-an sa Central Visayas ang nakapahimulos sa nagkadaiyang scholarship programs, gikan man sa pampublikong buhatan o sa pribadong sektor.
Usa na niini ang Cebu City Tertiary Education Scholarship Program nga gisugdan pa sukad niadtong tuig 2010.
Dugang pa ni Jimenez, positibo usab ang ilang pagtan-aw sa pasaad sa presidente nga patauran og internet connection ang tanang tunghaan sa tibuok nasod.
Kini nga lakang gitumong aron mahatagan og dali ug hapsay nga akses sa impormasyon ang mga tinun-an ug magtutudlo, ilabi na sa digital nga panahon karon.
Gidugang niini, nga ang tibuok DepEd-7 nagpabilin nga suportado sa mga programa ug inisyatiba sa kasamtangang administrasyon alang sa kalambuan sa edukasyon sa nasod.
