CENTRAL VISAYAS- Misaka na sa 24 ka indibidwal ang ihap sa mga gipasakaan og kaso kalabot sa giingong online scam hub nga nadiskobrehan sulod sa IT Park, Cebu City.
Sumala sa Regional Anti-Cybercrime Unit 7 (RACU-7), sa pinakabag-ong kalamboan sa imbestigasyon, 11 ka dugang suspek ang gaatubang og kaso gahapon Agosto 1.
Gitumbok sa mga otoridad nga ang pag-ila kanila nakabase sa CCTV footage ug ubang digital nga ebidensya.
Giila kini sa ilang mga alyas nga Frank, Judelyn, Benson, Bryll Anthony, Lilidel, Esperanza, Benedict, Joseph James, Rex Chilton, Shaira, ug Rowel, giingong nalambigit sa investment scam operation nga gipatuyok sa usa sa mga kompanya nga nahimutang sa IT Park.
Gipasakaan sila og kaso ubos sa Section 11 (Investment Fraud) sa Republic Act 11765 o ang Financial Products and Services Consumer Protection Act, ug apil usab sa Section 1016 sa balaod sa Proteksyon sa Konsyumer.
Matod ni Police Brigadier General Redrico A. Maranan, Regional Director sa PRO-7, dako ang paningkamot sa ilang buhatan aron matumbok ug mapasakaan og kaso ang tanang sakop sa grupo.
Base sa datos sa RACU-7, mao kini ang timeline sa pagpasang-at sa kaso:
Hulyo 4, 2025 – 1 ka personalidad (gituohang mastermind)
Hulyo 11, 2025 – 3 ka personalidad
Hulyo 18, 2025 – 3 ka personalidad
Hulyo 25, 2025 – 6 ka personalidad
Agosto 1, 2025 – 11 ka personalidad
Padayon ang paningkamot sa RACU-7 sa pagkolekta og dugang ebidensya ug pag-ilala sa ubang posible pang mga may kalambigitan sa maong iligal nga kalihukan.
Gipahimangnoan usab sa kapulisan ang katawhan nga magmatngon batok sa mga investment offers nga way klarong legalidad, ug gihangyo ang mga adunay kasayuran nga mokontak dayon sa RACU-7 o sa Police Regional Office 7 (PRO-7) aron makatabang sa imbestigasyon ug pagpanalipod sa uban pang posibleng biktima.
