Kupot sa eight-division world champion nga si Manny Pacquiao ang ikasiyam nga puwesto sa welterweight rankings, base sa pinakaulahing pagtuki sa The Ring, duha ka semana human sa iyang away ni Mario Barrios.
Mibalik dayon ang pangalan ni Pacquiao sa ranking, bisan pa sa upat ka tuig nga pahulay human sa iyang temporaryong pagretiro.
Ang Filipino boxing legend nagsunod sa iyang kaatbang nga si Barrios isip ranked number 8.
Ang The Ring mao ang gitawag nga ‘bible of boxing’ nga kanunay nga nagpagawas sa mga bag-ong ranggo alang sa mga boksidor sa tibuuk kalibutan.
Sa laing bahin, ang undefeated welterweight fighter nga si Brian Norman maoy nanguna sa listahan, gisundan sa bag-ong si Eimantas Stanionis samtang si Giovanni Santillan maoy ikatulo sa listahan.
Sumala sa The Ring, ang bag-ong ranggo mao ang resulta sa usa ka panel discussion, ug pagtuki uban sa tabang sa Ratings Panel sa mga boxing journalists sa tibuok kalibutan.
Ang panel gilangkoban sa mga historian, ug boxing journalists nga giisip nga eksperto sa ilang tagsa-tagsa ka natad.
Pipila sa mga butang nga gikonsiderar mao ang mga resulta sa ilang mga duwa, performance sa usag usa, ug ilang tagsa-tagsa nga mga track record.
