CEBU CITY- Nasikop ang duha ka Malaysian nationals sa usa ka iladong hotel sa Cebu City human masakpan nga naggamit og mga iligal nga communication devices nga makasagap og sensitibong datos gikan sa cellphone ug internet networks, lakip na ang 5G.
Giila ang mga suspetsado nga sila Chong Hong Yee ug Kim Chui Tan, nga kasamtangang gikuptan sa Bureau of Immigration (BI) tungod sa ilang kalapasan sa immigration laws sa nasud.
Ang operasyon gihimo sa National Bureau of Investigation – Central Visayas Regional Office (NBI-CEVRO), kauban ang Cybercrime Investigation and Coordinating Center (CICC), Bureau of Immigration (BI), ug uban pang kauban nga ahensya niadtong Hunyo 28, 2025.
Kini nga operasyon, gibase sa hangyo ni Atty. Renato Paraiso sa CICC, nga misang-at og report kabahin sa kalihokan sa mga suspetsado.
Sa ilang inspeksyon, nadiskubre sa kwarto sa duha ka suspek ang mga high-tech sniffing devices sama sa IMSI catchers, Raspberry Pi units, ug mga antenna modules—mga kagamitan nga kasagarang gigamit sa paniktik o pagpangolekta og datos gikan sa wireless networks.
Gipagawas sa korte ang usa ka Warrant to Search, Seize, and Examine Computer Data (WSSECD), nga opisyal nga gisilbi niadtong Agosto 8, 2025.
Gikompirma sa mga eksperto sa Department of Information and Communications Technology (DICT), CICC, ug National Telecommunications Commission (NTC) nga ang mga nasakmit nga kagamitan delikado ug nanginahanglan og espesyal nga permit sa paggamit, ilabi na sa paggamit niini sa sulod sa Pilipinas.
Kasamtangang gi-undergo og forensic analysis ang mga nakumpiskang ebidensya aron masuta ang bug-at sa ilang mga kalihokan ug posible nga koneksyon sa internasyonal nga espiya o cybercrime networks.
Gilauman nga pasakaan og kaso ang mga suspetsado ilalom sa Republic Act 10175 o ang Cybercrime Prevention Act of 2012. Posible usab nga adunay dugang pang kasong ipasaka batok kanila sanglit ilang gi-violate ang mga lagda sa telecommunications ug immigration.
Sumala sa mga imbestigador, kini nga insidente nagpakita sa bag-ong modus sa mga sindikato, diin ilang gibalhin ang ilang operasyon gikan sa kasagarang opisina ug residential areas ngadto sa mga hotel ug resort. Kini ilang gibuhat aron malikayan ang kahibalo sa mga otoridad ug aron makalihok og hilom sa ilang mga kalihokan.
Padayon ang lalom nga imbestigasyon sa mga ahensya sa gobyerno aron matumbok kon adunay uban pa nga kauban ang mga suspek—dinhi man sa Pilipinas o sa gawas sa nasud.
