Taliwala sa mitumaw nga tensiyon tali sa Kamara ug Senado tungod sa impeachment proceedings ni VP Sara Duterte, malaumon gihapon si House Deputy Speaker ug Iloilo Representative Janet Garin nga mahibalik sa normal ang maayong relasyon sa duha ka balay sa Kongreso.
Naglaum ang magbabalaod nga ang mga debate ug diskusyon tali sa mga magbabalaod dili matapos sa personal nga pag-atake, pagbutangbutang, o insulto.
Ingon man nga gituohan niini nga respetuhon nila ang usag usa alang sa kaayohan sa mga Pilipino nga ilang gialagaran.
Matod niya nga daghang mga senador ang mihimo og dili maayong mga pamahayag sa Balay nga nakamugna pa og impresyon nga ang House of Representatives nagkagubot.
Kalabot pa kini sa nangaging isyu sa impeachment trial sa Bise Presidente nga gituki usab sa tibuok Pilipinas.
Gihatagan og gibug-aton ni Garin nga wala mamatikdi ang halapad nga trabaho ug dedikasyon sa mga kongresista, ingon man ang mga paningkamot sa Speaker of the House sa pagsulbad sa mga problema nga gipatungha sa mga miyembro sa Kamara.
Hinungdan nga nanawagan siya nga ibalik ang taas nga mga sumbanan sa pamatasan, diplomasya, ug propesyonalismo sa lehislatura, tungod kay adunay mga higayon nga nalapas kini. | Bombo El Jonah Cañete
