Mosang-at og bag-ong protesta ang Pilipinas batok sa peligrosong aksyon sa China sa Scarborough Shoal karon lang semanaha.
Matod ni Department of Foreign Affairs (DFA) Sec. Maria Theresa Lazaro, anaa pa sila sa proseso sa posibleng pagsang-at og bag-ong protesta batok sa China apan sa pagkakaron, nagbinantayon sila sa maong isyu dungan sa pagpadayag sa pag-abli sa nasud sa pagpahigayon og diplomatic dialogue uban sa China isip labing maayong lakang sa maong sitwasyon.
Si Sec. Lazaro nagtuo nga ang duha ka habig kinahanglang ipatuman ang duha ka nag-una nga mga conventions lakip ang International Regulations for Preventing Collisions ug Sea ingon man ang Safety of Life at Sea Convention.
Ang kalihim nihimo sa pamahayag sa sidelines sa exchange of notes sa Reciprocal Access Agreement (RAA) tali sa Pilipinas ug Japan gahapon, Martes, Agosto 12.
Kahinumduman nga nahitabo niadtong Lunes, Agosto 11 ang laing insidente sa pagpanghasi sa barkong iggugubat sa Chinese Navy ug China Coast Guard vessel 3104 batok sa BRP Suluan duol sa Scarborough Shoal.
Diin ang CCG vessel nga nisuway pagpalayas sa barko sa Pilipinas pinaagi sa water cannon bombardment nadasmagan usab sa usa ka Chinese warship.
Nagresulta kini sa pagkaguba sa forecastle sa CCG vessel, bisan kung wala’y kumpirmasyon gikan sa China kung adunay mga tripulante nga nasamdan sa insidente.
