Gikumpirmar sa Department of Foreign Affairs (DFA) nga 78 ka mga Pilipino nga biktima sa human trafficking sa Myanmar ang gibuhian gikan sa gitawag nga mga scam center.
Natanggong sila kaniadto tungod sa mga kaso nga may kalabotan sa imigrasyon, lakip ang ilegal nga pagsulod ug pagpuyo.
Sumala sa DFA, ang Embahada sa Pilipinas sa Yangon kay nakig-alayon sa mga awtoridad sa Myanmar aron masiguro ang paspas, luwas, ug hapsay nga pagpauli sa mga Pilipino.
Nagpasalamat usab ang DFA sa gobyerno sa Myanmar sa mga lakang niini nga humanitarian ug maloloy-on, nga dungan sa pagsaulog sa Bag-ong Tuig sa Myanmar (Thingyan).
Giingon sa ahensya nga kini usa ka pamatuod sa maayong relasyon tali sa Pilipinas ug Myanmar.
Niadtong 2025, ang Department of Migrant Workers (DMW) nakahimo sa pagpauli sa 839 ka mga Pilipino gikan sa Myanmar, diin 690 ang gihatagan og tabang sa panginabuhi ug kaayohan.
Padayon usab nga gimonitor sa DMW ang mga online posting nga nagtanyag og peke nga package tours ug trabaho sa Thailand, Cambodia, Laos, ug Myanmar.
Kapin sa 200 ka mga Pilipino sa Myanmar ang nangayo na og tabang alang sa pagpapauli, samtang 17,000 ka mga post nga may kalabotan sa ilegal nga recruitment ug peke nga mga tanyag sa trabaho ang gitangtang online.
