PROVINCE OF CEBU- Gipalaw ug giingnan pa nga “nagsakay-sakay” lang ni Cebu Provincial Governor Pamela “Pam” Baricuatro si 5th District Representative Vincent Franco “Duke” Frasco, kalabot sa suhestyon niini nga palambuon ang Provincial Hospital sa Dakbayan sa Danao, nga nahimutang sulod sa Kinto Distrito.
Si Frasco maoy unang miduso sa House Bill No. 3313, nga nagtumong sa pag-upgrade sa tambalanan sa Danao ngadto sa Level 2 hospital ug pag-ila niini sa bag-ong ngalan nga North Cebu Medical Center (NCMC).
Nanghinaot usab siya og suporta gikan ni Baricuatro aron mapalambo ang serbisyong medikal sa tibuok Kinto Distrito ug amihanang Sugbo.
Apan, sa press conference ni Baricuatro sa Kapitolyo niadtong Miyerkules, Agosto 13, giingon niini nga daw nagsakay-sakay ra si Frasco sa tumong ug tinguha sa iyang administrasyon sa pagpabaskog sa mga tambalanang gidumala sa Kapitolyo, nga matod pa niya, giinutil sa miaging administrasyon nga gihuptan sa ugangan sa kongresista.
Dugang pa sa gobernador, ang pagpalambo sa usa ka ospital dili na kinahanglang moagi pa sa balaodnon sa Kongreso, kondili pinaagi sa pagsunod sa mga lagda ug rekisitos sa Department of Health (DOH).
Kini base sa professional nga opinyon ni Provincial Health Consultant Dr. Nikki Catalan.
Gani, pasumbingay pa ni Baricuatro kung nganong sauna, “suroy-suroy” ra ang estilo sa pagpangulo sa kanhi gobernador sa Sugbo, si former Governor Gwendolyn Garcia.
Sa laing bahin, mitubag si Rep. Frasco pinaagi sa iyang social media account, nga ipadaplin unta ang politika hangtod 2028.
Matod pa niya, dili siya palaaway ug andam siyang makigtambayayong alang sa kalamboan sa Sugbo ug mga Sugbuanon, samtang nag-isa pa siya sa iyang kamot isip simbolo sa pakigtambayayong.
