Wala magdahom ang Department of Justice nga niluwat og resignation si Retired Judge Jaime B. Santiago, ang kanhi direktor sa National Bureau of Investigation, busa matod pa ni Justice Assistant Secretary ug Spokesperson Mico Clavano, nakurat ang departamento sa pag-resign niini…
Gipahimuslan nalang niini ang kahigayunan pamaagi sa iyang gipadayag nga pagpasalamat sa maayong performance nga iyang gipakita isip pangu sa buhatan nga matod pa niya, nagustohan ni Justice Secretary Jesus Crispin Remulla.
Apan bisan nga nasagmuyo si Clavano sa pag-resign ni Santiago, nipaambit siya nga wala na kini puruhan nga mausab pa tungod kay usa kini ka ‘irrevocable resignation,’ ug bisan paman nga dili “specific” o natino pag-ayo ang rason, gikosniderar gihapon kini niya nga personal nga desisyon ni Santiago.
Samtang, sa dihang gipangutana kung aduna bay irekomendar ang Department of Justice isip hulip kang NBI Chief Santiago, siya niingon nga mas maayo nga gikan kini sa law enforcement cluster sa maong departamento.
Dinhi, iyang gipaambit nga posibleng si Justice Undersecretary Jesse Andres maoy temporaryong hulip o ‘Officer-in-charge’ sa National Bureau of Investigation.
Apan kini ang giklaro ni Justice Secretary Jesus Crispin Remulla sa dihang niingon nga wala sa iyang opsyon ang pagtudlo og ‘OIC’.
Matod niya labot kini sa gisumitir nga ‘resignation’ ni Retired Judge Jaime Santiago nga nagkanayon nga magpabilin siya sa katungdanan hangtod nga matudlo ang bag-ong hulip.
Kahinumduman nga si National Bureau of Investigation Director Jaime B. Santiago bag-o lang nisumiter sa iyang ‘irrevocable resignation’ aron moluwat sa iyang katungdanan.
