Naangkon na usab sa ikatulong higayon ang Billboard Fan Army Face-Off sa SB19 fanbase nga A’TIN batok sa mga international artists sama nalang sa Selenators o mga fans ni Selena Gomez.
Kini human nakakuha og 60.1% nga boto sa final round samtang nakakuha ang Selenators og 39.9%.
Tungod niini, mao na kini ang ikatulong tuig sa A’TIN aron madala ang kadaugan sa SB19 sukad niadtong 2023 ug patas na kini sa T-ara’s Queens isip fan base nga adunay labing daghang kadaugan.
Sukad sa paglunsad sa Billboard Fan Army sa 2014, ang mga mananaog kanunay nga gidominar sa mga Asian acts.
Gawas sa T-ara, ang nangaging mga mananaog naglakip sa mga fans sa BigBang, Super Junior, ug Stray Kids.
Ang SB19 — gilangkuban nila Pablo, Josh, Stell, Ken, ug Justin — anaa karon sa ilang “Simula at Wakas” tour, bisan tuod nga sila mibalik sa ilang yutang natawhan alang sa ubang mga kalihokan matag karon ug unya.
Ang sunod nga hunongan sa ilang tour mao ang Singapore, nga ipahigayon sa Arena @ Expo karong Agosto 24. Gikatakda usab silang mobisita sa Hong Kong, Tokyo, Dubai, Doha, Riyadh, Jeddah, Sydney, ug Melbourne.
