Nasuko si Presidente Ferdinand Marcos Jr. human nadiskobrehan ang usa ka ghost project sa Baliwag, Bulacan.
Kini human giinspeksyon sa Presidente ang laing flood control project sa Purok 4, Brgy. Piel, Baliwag, Bulacan.
Gikanayon ni Marcos nga basi sa dokumento, ang proyekto gikataho nga nahuman na niadtong Hunyo.
Apan sa dihang gipangita sa Presidente, wala silay nakitang bisan usa ka hollow block sa 220 metros nga proyekto nga nagkantidad og P55.7 milyones ka pesos.
Gidugang sa Presidente, klaro nga walay bisan usa ka adlaw nga gitrabaho ang maong proyekto ug mogawas nga ghost project kini.
Busa, mag-atubang og daghang kaso ang mga nalambigit nga kontraktor.
Ang Presidente nagkanayon nga alang sa mga dagkong proyekto, usa ka kasong economic sabotage ang posibleng ipasaka samtang ilang nakita nga falsification of public documents ang posibleng ipasaka batok sa contractor sa maong proyekto sa Barangay Piel sanglit ang report nag-ingon nga nahuman na kini apan walay nahimo o walay nakitang proyekto.
Basi sa dokumento, ang Syms Construction Trading maoy contractor sa maong proyekto ug ang implementing office mao ang Bulacan 1st District Engineering Office.
Ang petsa sa pagka-epektibo sa kontrata kay Peb 22, 2025 nga matapos o adunay expiration date sa Oktubre 22, 2025.
Ug gipondohan kini ubos sa 2025 National Expenditure Program (NEP).
Mao usab kini ang hinungdan nga nagpadayon ang pagbaha sa maong dapit.
Matod niya nga mahimo usab nga makunhuran ang utang sa Republika sa Pilipinas kon maayo pa nga mapatuman ang maong mga proyekto.
Apan tungod kay matod niya walay proyekto nga nahuman ug nabayran sa hingpit, padayon kining nakadaot sa lokal nga mga residente ug sa panalapi sa gobyerno.
