Miikyas na ang mga Palestino gikan sa pipila ka bahin sa Gaza City human gilunsad sa Israel ang unang hugna sa giplanong ground offensive.
Basi sa taho nga gatusan ka mga Palestinian sa Al-Zeitoun ug Al-Sabra kasilinganan sa Gaza City mibakwi na ngadto sa amihanan-kasadpan sa siyudad human sa kusog nga pagpamomba sa lugar nga nakaguba sa mga balay ug nakapatay sa daghang mga tawo, lakip ang mga pamilya sa mga tolda ug mga balay, ingon man sa daghang mga inosenteng bata.
Ingon man nga gipaambit sa usa ka tigpamaba sa Israeli Defense Forces nga ang mga tropa nagsugod sa mga operasyon sa Seitoun ug Jabalia nga mga lugar alang sa plano sa pag-okupar human kini giaprobahan ni Defense Minister Israel Katz niadtong Martes ug moabot sa 60,000 ka mga reservist ang gipatawag sa sayong bahin sa Setyembre aron ipakatap kauban ang mga active-duty personnel alang sa operasyon.
Gipahibalo usab ni Israeli Prime Minister Benjamin Netanyahu nga iyang gipamub-an ang timeline alang sa pagkubkob sa iyang gitawag nga katapusang kuta sa teroristang grupo sa Hamas sa Gaza.
Sa usa ka pahayag, giakusahan sa Hamas si Netanyahu sa pagpadayon sa brutal nga gubat batok sa mga inosenteng sibilyan sa Gaza City ug gisaway ang iyang pagsalikway sa usa ka sugyot sa hunong-buto gikan sa mga tigpataliwala sa rehiyon.
Gani, sa sayo pa, ang mga tropa sa Israel mikontrolar sa gawas sa Gaza City, pinuy-anan sa kapin sa usa ka milyon nga mga Palestinian, human sa mga adlaw sa bug-at nga pagpamomba ug pagpabuto sa artilerya.
