Gihingusgan sa Department of Health (DOH) ang ilang monitoring taliwala sa pagsaka sa mga kaso sa hand, foot and mouth disease (HFMD).
Base sa datus sa ahensya niadtong Agosto 16, niabot na sa 39,893 ang kaso sa maong sakit sa nasud.
Kini usa ka pagtaas sa kapin sa 2,000 sa usa lang ka semana gikan sa mga kaso nga natala kaniadtong Agosto 9.
Matod sa DOH, dul-an sa katunga sa mga nataptan mao ang mga bata nga nagpanuigon og usa ngadto sa tulo ka tuig.
Agig tubag, ang departamento nakig-alayon sa mga lokal nga gobyerno aron pakusgon ang pagbantay sa mga nataptan sa rehiyon.
Gawas niini, nagpahigayon usab og tigom ang ahensya sa health learning institution sa DOH sa mga lakang nga himuon aron malikayan ug madumala ang maong sakit sa mga tunghaan.
Matod sa DOH, ang HFMD usa ka makatakod nga sakit nga mahimong makuha pinaagi sa laway nga adunay virus gikan sa pag-ubo, pag-atsi o pagsulti.
Busa, subling gitambagan sa DOH nga kung makasinati og mga sintomas sama sa hilanat, samad sa baba, sakit sa tutunlan, ug paltos sa mga palad ug lapalapa, magpakonsulta dayon sa pinakaduol nga health center.
Kung malumo ang kondisyon, mahimo nimong i-isolate ang kaugalingon sa balay sulod sa pito hangtod 10 ka adlaw o depende sa tambag sa doktor ug pag-disinfect sa imong kagamitan ug pagpraktis sa 20 segundo nga paghugas sa kamot aron malikayan ang viral transmission.
