Gikondena sa Kagamhanan sa Dakbayan sa Mandaue, pinaagi sa Health Board ug sa Konseho, ang padayong pagpakaylap sa mga “anti-vaccination” nga mensahe ug post sa social media nga maoy gitudlong hinungdan sa dakong pag os-os sa vaccination rate sa dakbayan.
Segun ni Konsehal Raul Kevin Cabahug, Chairman sa Committee on Health sa Dakbayan sa Mandaue, gituki sa ilang Health Board meeting ang kalit nga pagkunhod sa gidaghanon sa mga nagpabakuna taliwala sa gilusad nga immunization campaign sa Department of Health (DOH) ug sa dakbayan.
Gibutyag ni Cabahug nga human sa pipila ka semana nga kampanya sa siyudad, naobserbahan ang dakong pag-ubos sa mga bakuna tungod sa mga post sa social media nga nagpakamenos sa mga bakuna ug nag-awhag sa mga ginikanan nga dili bakunahan ang ilang mga anak.
Gipasabot sa konsehal nga adunay mga report sa kamatayon o kadaot sa pipila ka mga bata nga gipasangil sa mga bakuna, apan iyang gipasiugda nga wala pa kini mapamatud-i nga tungod sa bakuna human sa usa ka hingpit nga imbestigasyon nga gihimo.
Isip usa ka professional nurse ug amahan sa duha ka gagmayng bata, si Cabahug miingon nga masabtan niya ang mga kabalaka sa mga ginikanan, apan napamatud-an na sa medisina sulod sa mga dekada nga ang mga bakuna luwas ug epektibo sa pagpanalipod batok sa makamatay nga mga sakit.
Tungod niining sitwasyon, ang konseho mipasar og resolusyon nga nagkondena sa mga nagmugna ug nagpakatap sa kampanya batok sa bakuna, samtang naghangyo usab sa Department of Health (DOH) nga mohimo og imbestigasyon ug ireport ang tinuod nga resulta ngadto sa media aron malimpyohan ang reputasyon sa bakuna ug mapanalipdan ang panglawas sa publiko.
