Giklaro sa buhatan sa Department of Education – Central Visayas (DepEd-7) walay pribadong institusyon sa rehiyon ang nalambigit sa gikabutyag nga “ghost beneficiaries” scam sa senior high school (SHS) voucher program atol sa budget deliberation sa House of Representatives.
Kini ang gipamahayag ni Dr. Salustiano Jimenez atol sa eksklusibong pakighinabi sa Bombo Radyo Cebu News Team diin masaligon kining misaysay nga nahisubay sa mga lagda sa balaod ang operasyon sa SHS voucher program ang mga tunghaan sa rehiyon.
Dugang pa niini nga nahisgutan na nila sa DepEd Central Office pinaagi ni Secretary Eduardo “Sonny” Angara ang maong kalihokan diin napasakaan na og legal action batok sa mga tunghaan nga nalambigit niini.
Gimandoan usab ni Jimenez ang mga District Superintendents nga susihon pag-ayo ang pagproseso sa maong voucher program aron dili mahitabo ang “ghost beneficiaries” scheme.
Ang maong makalilisang nga alegasyon kay gibutyag atol sa budget deliberation sa House Committee on Appropriations diin gituki niini ang DepEd niadtong Miyerkules, Septiyembre 3.
