CEBU CITY- Gikuwestiyon ni City Councilor Jun Alcover ang pagdumala sa Cebu City Night Market nga gi-host sa Garbo Asenso Sumbanan sa Alyansa (GASA) Board, tungod sa mga reklamo nga nadawat gikan sa pipila ka mga tindera.
Matud ni Alcover, aduna nay mga tawo nga misugod og sukod ug pagkolekta sa bayad alang sa mga espasyo sa Colon Street, bisan pa man nga wala pa’y pormal nga aprobasyon gikan sa GASA Board.
Gikwestyon usab niya kung kinsa ang nagtugot sa pagbutang sa mga numero sa espasyo ug pagkolekta sa bayad, nga wala’y klarong mandato.
Dugang pa ni Alcover, nakadawat siya og impormasyon nga aduna nay anomalya sa night market, lakip na ang pagpalit-ug-baligya sa mga puwesto, nga gipasanginlang gibuhat sa mga indibidwal nga wala sa hustong awtoridad.
Tungod niini, nanawagan siya kang Mayor Nestor Archival nga ipatawag ang GASA Board aron klarohon ang proseso ug malikayan ang mga posibleng anumalya sa pagpahigayon sa night market.
Gipahimangnoan usab ni Alcover nga andam siyang supakon ang pagpahigayon sa night market kung kini ipatuman nga walay klaro nga resolusyon gikan sa GASA Board.
