Nipadayag si Senador Francis “Kiko” Pangilinan sa iyang kaandam nga mo-draft og balaudnon nga maghatag og subpoena powers ngadto sa independent commission nga mag-imbestigar sa mga anomalosong flood control projects.
Gipasabot ni Pangilinan nga samtang ang Presidente adunay gahum sa paghimo og independenteng komisyon ubos sa Administrative Code, ang Kongreso o ang Hudikatura lamang ang maka-isyu og subpoena powers pinaagi sa balaod o internal rules.
Hinungdan nga andam siyang mosang-at og balaudnon aron mahatagan og gahom ang komisyon sa subpoena ug mapugos ang mga testigo nga mopatim-aw o mosumiter og mga dokumento.
Kini nga lakang subay sa nagpadayon nga imbestigasyon sa Senado ug Kamara de Representantes bahin sa mga ghost ug substandard nga mga proyekto sa imprastraktura nga nagkantidad og gatusan ka milyon ka pesos.
Dugay nang nanawagan si Pangilinan nga adunay tulubagon ang mga opisyal sa gobyerno ug mga kontraktor nga nalambigit sa isyu.
Hingpit usab nga gisuportahan niya ang usa ka independent commission nga matod niya kinahanglan pangunahan ni kanhi Department of Public Works and Highways (DPWH) Secretary Rogelio Singson ug kanhi Ombudsman Conchita Carpio-Morales.
