Gihimakak ni kanhi Cebu Provincial Governor Gwendolyn “Gwen” Garcia ang mga alegasyon nga aduna kiniy koneksyon sa magtiayong Discaya ug Quirante nga mga nalambigit sa init nga diskusyon sa anomalosong mga flood control projects nga giimbetigaran sa kaulohan.
Kini ang nahimong pamahayag sa kanhi gobernadora atol sa gihikay nga press conference niini niadtong Lunes, Septiyembre 8 sa iyang opisina sa Mandaue City diin mao kini iyang unang pagpatim-aw sa mga sakop sa tigbalita sa Sugbo sukad sa lubong nga kapildihan niini niadtong nakalabayng pinilay pag Mayo 2025 batok kang Governor Pamela “Pam” Baricuatro.
Sumala pa ni Garcia nga wala siyay koneksyon nilang Pacifico “Curlee” Discaya ug sa asawa niining si Cezarah “Sarah” Discaya nga nanag-iya sa dili muminos siyam ka mga construction firms nga nakabase sa kaulohan nga nangharos og mga kontratang proyekto sa gobyerno ubos sa Department of Public Works and Highways (DPWH).
Midistansya sab si Garcia batok kang Allan Quirante sa QM Builders nga usa sa mga nanganlan ni Presidente Ferdinand “Bongbong” Marcos Jr. sa top 15 government contractors sa mga flood control projects bisan paman og kaparehong lungsod kini silang gigikanan sa Dumanjug sa habagatang-kasadpang Sugbo.
Asoy pa niini nga si Quirante kay miangkon lang nga adunay pagkahinigalaay sa iyang anhing amahan nga si former Cebu Governor Pablo “Pabling” Garcia.
Gani kusganong gihimug-atan niini nga ang maong kompanya kay wala makakuha og mga proyekto sa probinsya ubos sa iyang administrasyon niadtong siya pa ang gobernadora sa Kapitolyo sa Sugbo.
