Gianunsyo sa Department of Justice nga ang hangyo alang sa proteksyon sa magtiayong Pacifico ‘Curlee’ ug Sarah Discaya posibleng moresulta sa detensyon kon mapamatud-an nga namakak sila.
Matod sa kasamtangang kalihim sa maong departamento nga si Sec. Jesus Crispin ‘Boying’ Remulla, mahimong pasakaan og kasong ‘perjury’ ang duha kon dili tinuod ang ilang gipaambit kanila.
Kung naa na sa ‘witness protection program’ ang magtiayon ug mapamatud-an nga namakak, matud niya posibleng tangtangon o bakwion kini kanila.
Apan sa pagkakaron, ‘no comment’ ang kalihim kung makonsiderar ba nga ‘credible witnesses’ ang magtiayong Discaya.
Samtang, susama usab ang gipaambit ni Justice Assistant Sec. Mico Clavano nga nagkanayon nga mag-atubang og kasong ‘perjury’ ang mga saksi nga mapamatud-ang namakak.
Matud pa nila nga ila kining ibase sa mga gipanumpaang pamahayag sa mga ‘witnesses’ nga ipaubos sa verification ug analysis sa departamento.
Samtang, abli ang kalihim sa magtiayong Discaya nga gikonsiderar alang sa witness protection program, kay matod niya nga silang tanan adunay potensyal nga maapil sa prebilihiyo nga proteksyon nga gihatag sa departamento.
Sa pagkakaron, matod sa kalihim, magpabiling ‘confidential’ ang bisan unsang isulti o ipaambit kanila sa magtiayon kalabot sa ilang nahibaw-an bahin sa mga anomaliya nga flood control projects.
