Gikwestiyon ni Senador Francis “Kiko” Pangilinan kung giunsa pag-withdraw sa bangko sa gatusan ka milyon ka pesos nga kantidad sa kuwarta sulod lang sa duha ka adlaw.
Kini nunot sa pagtambong ni Landbank Malolos Head Ma. Lilibeth Lim sa Senate Blue Ribbon Committee hearing sa flood control scandal.
Gitumbok ni Pangilinan nga ang pag-withdraw sa tag-iya sa SYMS Construction nga si Sally Santos sa P457-milyones sulod lang sa duha ka adlaw.
Gipangutana sa Senador si Lim kung wala ba matingala ang management sa bangko nganong gikuha ang kuwarta, ug giunsa man sa contractor nga maka-withdraw sa balor nga P457-milyones.
Nitubag si Lim nga wala siya masurprisa o makahuna-huna og negatibo kay ang pundo gikan sa gobyerno ug sa Department of Public Works and Highways (DPWH).
Matod niya masaligon ang bangko nga maabot kini sa proyekto sa gobyerno, mao nga wala makwestiyon ang gatusan ka milyon ka pesos nga kantidad sa withdrawal.
Giingong adunay proyekto ang Syms Construction sa mga giila nga ghost projects sa Bulacan.
Base sa impormasyon nga mitumaw sa miaging mga hearing, sila si kanhi DPWH engineers Henry Alcantara ug Brice Hernandez giingong nanghulam og lisensya ni Syms ug gigamit kini sa mock bidding.
Gibahin-bahin usab nila ang nahabiling porsiyento, sa higayon nga mahatag na ang ilang ‘obligasyon’ ngadto sa mga magbabalaod nga nagsilbing proponent sa maong mga proyekto.
