Nagpabiling naka-standby ang National Food Authority (NFA) Operation Centers sa pagtubag sa mga panginahanglanon sa disaster response units sa gobyerno ilabi na sa mga lugar nga naigo sa kalamidad sama sa Bicol Region ug Mimaropa.
Matod sa NFA, ang mga lokal nga kagamhanan sa Albay, Libon, Daraga, Malilipot, Catanduanes, Baras, ug Pili nag-withdraw na sa mga suplay sa bugas gikan sa mga bodega sa ahensya aron ipang-apod-apod sa mga apektadong residente.
Nipagawas na usab ang Negros Occidental og mga suplay sa bugas alang sa Provincial Disaster Risk Reduction and Management Office isip ayuda sa mga naapektuhan sa Bagyong Opong.
Una nang gipahibalo ni NFA Administrator Larry Lacson nga 2.4 milyones ka sako sa bugas ang gigahin alang sa disaster response.
Gipasalig sa NFA nga padayon kining nakig-alayon sa mga lokal nga kagamhanan aron maseguro ang igong suplay sa dekalidad nga bugas alang sa dinaliang pag-apod-apod sa mga lugar nga naigo sa kalamidad.
