Human sa pag-usbaw sa pundo para sa tuig 2026, si House Appropriations Chair Mika Suansing mihangyo nga doblehon ang benepisyo nga gihatag sa PhilHealth ngadto sa mga miyembro niini.
Kini aron mas magamit sa mga Pilipino ang ilang kontribusyon sa ahensya.
Matod ni Suansing, ang pag-usbaw sa pundo kinahanglang direktang moresulta sa mas taas nga benepisyo sa mga sakop sa PhilHealth.
Gibutyag ni Suansing nga ang Budget Amendments Review Subcommittee (BARC) nakahukom sa paggahin ug dugang ₱60 bilyon nga pundo para sa PhilHealth.
Kini nga pondo dugang pa sa orihinal nga alokasyon nga kapin sa ₱50 bilyon nga naapil na sa National Expenditure Program (NEP) para sa sunod tuig.
Niini, ang kinatibuk-ang pundo sa PhilHealth alang sa sunod tuig moabot sa kapin sa ₱100 bilyon. Gilauman nga kining dakong pag-usbaw makapahimo sa PhilHealth sa pagpalapad ug pagpauswag sa mga serbisyo niini ngadto sa publiko.
Ang dugang nga ₱60 bilyon nga pondo para sa PhilHealth naggikan sa pagtangtang sa kapin sa ₱250 bilyon nga pondo nga orihinal nga gitagana alang sa mga proyekto sa pagpugong sa baha sa 2026.
Gipasiugda usab sa magbabalaod nga kinahanglang magpakita ang PhilHealth og konkretong pasalig sa pagpataas sa kaso sa mga batakang serbisyong medikal alang sa mga miyembro niini.
