Magsugod karon buwan sa Oktubre ang pagpaumento sa singgil sa bayrunon sa suplay sa tubig ang Metropolitan Cebu Water District (MCWD).
Kini human giaprobahan sa Local Water Utilities Administration (LWUA) ang maong sugyot nga 12% umento sa water rate adjustment sa giserbisyohan sa MCWD sugod karong adlaw sa Miyekules, Oktubre 1 nga maoy pinakaunang pagpasaka sa singgil niini sulod sa 10 ka tuig diin ang ulahing pagsaka kay kaniadto pang Enero 2015.
Niadtong nakalabayng buwan sa Septyebre nakadawat aog notisya ang MCWD gikan sa LWUA pinaagi ni Administrator Jose Moises Salonga sa pag-aprobar sa aplikasyon sa pagpasaka sa water rate adjustment.
Ang mga koneksyon sa tuibug sa 1/2-inch meter nga sagad mga residential area consumers kay adunay minimum nga singgil sa unang 10 cubic meters sa P235.60.
Ang bag-ong commodity charges kay gitakda sa P26.04 per cubic meter para sa 11-20 cubic meters nga konsumo, samtang P30.64 per cubic meter para sa 21-30 cubic meter nga konsumo, ug P75.02 per cubic meter sa singgil sa mukonsumo og 31 cubic meters pataas.
Gipangatarungan sa MCWD nga ang nagkasakang gastuunon sa operasyon og ang ilang binilyon nga expansion ug rehabilitation projects ang rason sa pagpasaka sa singgil nga unang gitakda unta niadtong tuig 2020 apan gihunong nilang tungod sa COVID-19 pandemic.
Sukad niadtong 2015, ang MCWD nigasto og P2.1 bilyones sa expansion ug rehabilitation projects aron mapalambo ang serbisyo sa tubig ug migahin og P12 bilyones alang sa operational expenses.
Ang mga dagkong proyekto naglakip sa P1.1-bilyon nga Lusaran Bulk Water Project, nga nagsugod sa paghatod sa 30,000 cubic meters nga tubig kada adlaw niadtong 2022, nga nakabenepisyo sa mga lugar nga wala kaayoy serbisyo sama sa Busay, Lahug, Apas, Camputhaw, Capitol Site, Pit-os, Lusaran, Pulangbato, Agsungot, Bina, Budliwan ug Gutaliwan.
