Nius-os ngadto sa 2.03 milyones ang gidaghanon sa mga Filipino nga walay trabaho o negosyo niadtong Agosto ning tuiga, base sa resulta sa Labor Force Survey sa Philippine Statistics Authority (PSA).
Anaa kini sa unemployment rate nga 3.9%, kini nagpasabot nga 39 sa 1,000 ka indibidwal ang walay trabaho o walay negosyo niadtong Agosto.
Mas ubos kini kon itandi sa 2.59 milyones niadtong Hulyo 2025 nga anaa sa 5.3% nga unemployment rate.
Gipasabot ni National Statistician ug PSA USec.Claire Dennis Mapa nga usa sa hinungdan sa pagkunhod sa kawalay trabaho niadtong Agosto mao ang pagbalik sa mga trabahante nga temporaryong nawad-an og trabaho niadtong Hulyo tungod sa sunodsunod nga mga bagyo nga miigo sa nasud.
Kini ilabi na nga magamit sa mga industriya sama sa agrikultura, retail, pamatigayon, ug konstruksyon.
Sa laing bahin, ang hepe sa PSA mitaho usab nga ang gidaghanon sa mga indibidwal nga nanarbaho apan nangitag dugang trabaho o mas taas nga oras sa trabaho aron madugangan ang ilang kita o kulang sa trabaho mikunhod ngadto sa 5.38 milyones niadtong Agosto.
