Nipadangat sa iyahang reaksyon si Kanhi COMELEC Commissioner Atty. Rowena Guanzon kabahin sa pag-appoint ni Presidente Ferdinand Marcos Jr. kang Jesus Crispin Remulla isip bag-ong Ombudsman.
Diin matod niya, klaro ug tataw nga nagtumong kini sa usa ka “demolition job” alang sa ilahang opponent sa umaabot nga 2028 election nga wala na’y makayano og dagan sa tagsa-tagsang posisyon.
Sa ekslusibong pakigsuta sa Bombo Radyo Cebu team kang Atty. Guanzon, iyahang gipadangat ang iyang ligdong nga paglantaw kabahin niini nga hisgutanan, diin matod niya, nga bisan wala pay 24 oras, nag-ingun na si Remulla nga pagalantawan niini ang funds sa Bise Presidente ug kung pwede ba niya makasuhan, taliwala sa mga pending nga kaso susama sa kaso batok ni Zaldy Co, DPWH, ug mga contractors.
Gihimug-atan usab ni Guanzon, nga klaro na nga ang sunod nga i-demolish mao si Sen. Risa Hontiveros ilabi na nga aduna kini potensyal nga mamahimong kandidato.
Busa, alang kaniya, “obvious” na kini nga appointment ni Remulla tungod kay mamahimo raman unta nga mang appoint kini gawas ni Remulla, apan kay lage, alang kang Guanzon, aduna nay marching orders ang presidente mao nga si Remulla ang daling napunit alang sa bag-ong katungdanan.
Gitataw sa ikaduhang punto ni Guanzon nga ang pag-appoint ni Remulla klaro nga ma-abswelto si Martin Romualdez ilabi na nga hangtud sa kasamtangan, wala pay kaso nga nasang-at batok kang Romualdez, gawas nga wala kini motunga sa Committee on Infrastructure.
Gikabutyag niya nga sa kasamtangang administrasyon, ang mga katawhan wala nay salig sa Presidente, ilabi na kang Remulla nga halata na sa panagway niini nga adunay nabaton nga kasuko kang Bise Presidente Sara Duterte.
Dugang pa niya, dili katoohan ang pamahayag ni Remulla nga “There will be no sacred cows, no exemptions, and excuses” ilabi na nga kung panaminan, si Romualdez nagpabiling gawasnon kay wala pa gipatawag sa ICI.
