PROVINCE OF CEBU- Mipadangat si Cebu Governor Pamela Baricuatro sa iyang prayoridad nga inisyatiba sulod sa unang 100 ka adlaw niini isip gobernadora sa probinsiya sa Sugbo nga maoy iyang gitotokan ubos sa iyang administrasyon.
Nagkanayon si Baricuatro nga sulod sa usa gatos ka adlaw, tulo ka butang ang iyang gitotokan, una ang paghatag og serbisyo ug accountable governance pinaagi sa pagpatuman og reporma aron mahapsay ang frontline services sa Kapitolyo ug mapalambo ang serbisyo sa panglawas, social welfare ug disaster resilience sa lalawigan.
Lakip usab sa iyang prayoridad ang pagpanalipod sa kwarta sa katawhan pinaagi sa pagpalambo sa transparency, oversight ug performance metrics.
Sunod niyang prayoridad mao ang kalamboan, investment ug oportunidad alang sa tanang Sugboanon, pinaagi sa pagpalapad sa mga programa alang sa mga local nga micro, small ug medium enterprises, mga mag-uuma ug coastal communities.
Lakip na usab ang pag invest sa mga importante nga imprastraktura ug digital connectivity alang sa edukasyon, panglawas ug komersyo.
Apil usab sa plano niini mao ang people-first leadership ug resilience pinaagi sa pagpahingusog sa social safety nets alang sa mga vulnerable ug pagpalapad sa community-based health initiatives.
Matud niini usa sa dakong hagit kaniya sa pagsugod sa iyang administrasyon, ang nahitabo nga linog sa northern Cebu diin liboan ka pamilya ang apektado.
Samtang sa pikas bahin mibutyag ang gobernadora nga usa ka “continuous journey” ang pang gobyerno ug daghan pa ang mga hagit nga iyang atubangon isip gobernador, uban sa daghang boses ug kritiko.
Misaad usab kini nga kanunay siya maminaw ug motubag sa kamatouran ug mototok sa kon unsay importante alang sa kaayohan sa mga katawhan.
