Gipahimangnuan karon ang katawhan sa Netherlands nga mangandam batok sa posibleng hulga sa Russia, human mibutho ang mga report nga ang nasangpit nga nasud posibleng maoy nagpaluyo sa sunod-sunod nga drone sightings sa tibuok Europa, bisan pa man nga wala pa kini hingpit mapamatud-an.
‎
‎Sa pakighinabi sa Bombo Newsteam kang Angel Axinto, Bombo International News Correspondent sa Netherlands, iyang gipahibalo nga sa miaging pipila ka semana, adunay mga drone nga nakalapas sa airspace sa labing menos walo ka mga nasod sa Europe, lakip na ang Denmark, Lithuania, Finland, Estonia, Romania, Germany, Belgium, ug Netherlands.
‎
‎Nakit-an usab ang mga drone duol sa mga base militar ug imprastraktura sa enerhiya, lakip na ang Karup Air Base sa Denmark ug usa ka planta sa kuryente sa Finland.
‎Bisan pa man nga wala pa’y klarong ebidensya nga gikan kini sa Russia, gituohan nga may kalabutan kini sa mga gipanghulga ni Russian President Vladimir Putin nga mopahamtang og silot sa mga nasod nga nagsuporta sa Ukraine.
‎
‎Tungod niini, gipaandam sa Gobyerno sa Netherlands ang publiko nga mag-andam og emergency package nga adunay sulod sama sa mga kandila, radyo nga adunay battery, ug mga pagkaong ready-to-eat, isip kabahin sa ilang precautionary measures kung ugaling adunay lakang nga buhaton ang Russia nga makaguba sa kalinaw sa nasud.
‎Bisan pa man niini, nagpabilin nga kalmado si Axinto, kay matod pa niya, andam ang Gobyerno sa Netherlands, uban sa tibuok Europe nga mutubag sa bisan unsang hulga sa seguridad.
