Mopasaka og kaso ang Federation of Free Farmers batok sa Department of Agriculture ug Bureau of Plant Industry, ingon man sa Bureau of Customs tungod sa kapakyas ug milapas sa probisyones sa EO 93.
Kini ang gipaambit ni Leonardo Montemayor, ang Chairman sa Federation of Free Farmers atol sa pakighinabi sa Bombo Radyo Newsteam, human nga nipagawas si Presidente Ferdinand Marcos, Jr. og Executive Order 93 niadtong Agosto 29, 2025 nga nagsuspinde sa importasyon sa regular ug well-milled rice sulod sa 60 ka adlaw sugod niadtong Setyembre 1, apan sukwahi kini sa kahimtang sa mga mag-uuma nga hilabihang nag-antos gumikan sa maong kapakyasan.
Busa, gikwestiyon sa Federation of Free Farmers ang legalidad sa importasyon sa kapin 315,000 ka toneladang bugas niadtong Setyembre 2025 bisan pa sa pagpahamtang sa pagdili sa importasyon sugod niadtong Setyembre 1.
Gikasubo usab sa FFF ang dayag nga pagkadoble sa gobyerno sa pagpakita sa pagtabang sa pagpanalipod sa mga mag-uuma sa bugas pinaagi sa pagsuspinde sa importasyon samtang sa samang higayon gitugotan ang dagkong mga kargamento sa wala gitugotan nga mga bugas sa unang bulan sa import ban.
Samtang, pabor kini sa panawagan ni Senador Francis “Kiko” Pangilinan sa administrasyon sa pag-isyu og executive order (EO) aron magtukod og floor price sa humay o unmilled rice.
Apan, gitataw ni Montemayor nga ulahi na kini karong tuiga gumikan magkinahanglan kini og taas nga higayon sa dili pa kini hingpit nga maaprobahan inay mamahimo man hinuon kini sa sunod tuig.
