Giduso ni Senate Committee on Finance Chairman Senator Sherwin Gatchalian ang pagpalig-on sa kapabilidad ug operasyon sa Philippine Coast Guard (PCG) taliwala sa nagpadayong tensyon sa West Philippine Sea.
Matod ni Gatchalian, iyang gitun-an ang posibilidad nga madugangan ang subsistence allowance sa mga personahe sa PCG nga P150 lang matag adlaw kon itandi sa P350 nga nadawat sa ubang uniformed personnel.
Gitataw sa senador ang kamahinungdanon sa pagmentinar sa taas nga moral sa mga sakop sa Coast Guard, ilabi na nga kanunay silang makasinati og harasment ug uban pang peligro samtang nagpatrolya sa West Philippine Sea.
Atol sa budget hearing sa Senado, gipasiugda ni Gatchalian ang kamahinungdanon sa pagsiguro sa padayon nga suporta sa PCG bisan pa sa mga hagit sa ilang operasyon.
Gihatagan usab niya og pasidungog ang mga personahe sa Coast Guard nga padayong nagsakripisyo ug nagbantay sa kadagatan aron panalipdan ang nasudnong soberanya.
Ang senador midugang nga ang misyon sa PCG adunay lapad nga epekto dili lamang sa Pilipinas kon dili lakip na sa tibuok Association of Southeast Asian Nations (ASEAN) ug North Asia, tungod kay ang mga panghitabo sa West Philippine Sea adunay implikasyon sa rehiyonal nga seguridad ug kalig-on.
