Mipahibawo si Gobernador Pamela Baricuatro nga si Baguio City Mayor Benjamin Magalong mitanyag sa pag-host sa labing unang panagtagbu sa Governors for Good Governance (G4GG), nga nagtimaan sa unang lakang paingon sa opisyal nga pagtukod sa koalisyon.
Gipaambit usab ni Gobernador Baricuatro ang maong impormasyon atol sa media briefing sa Kapitolyo niadtong Miyerkules, Oktubre 15, human sa pagbisita ni Mayor Magalong dinhi sa Sugbo.
Mibiyahe si Mayor Magalong sa Sugbo niadtong adlawng Martes, Oktobre 14, aron personal nga maghatag og hinabang, nga naglakip sa ?125,000 gikan sa Mayors for Good Governance (M4GG) ug ?2 million gikan sa Baguio City, alang sa upat ka local government units nga naapektuhan sa linog sa amihanang Sugbo.
Gibutyag usab ni Baricuatro nga aduna usab laing tulo ka gobernador gikan sa Kabisay-an ug upat gikan sa Luzon ang interesado nga mosalmot sa koalisyon.
Kauba niini sa koalisyon sila si Bohol Gov. Erico Aristotle “Aris” Aumentado, Negros Occidental Gov. Eugenio Jose “Bong” Lacson, ug Romblon Gov. Trina Firmalo-Fabic.
Samtang sa pikas bahin, pinagi sa usa ka private meeting, gipakita ni Magalong ngadto sa gobernador ang iyang gihulagway nga “shocking” data sa budget insertions nga nakaapekto sa probinsiya nga mokabat kuno sa binilyon ka pesos.
Sigon usab ni Baricuatro nga nangayo siyag dugang mga dokumento gikan kang DPWH Secretary Vince Dizon aron suportahan ang datos nga gi-review sa Kapitolyo.
