Giaprubahan sa 17th Sangguniang Panlalawigan, ubos sa pagpangulo ni Vice Governor Glenn Anthony Soco, ang usa ka resolusyon nga nagtugot sa pagpagawas og ₱10 milyones nga tabang pinansyal alang sa General Santos City.
Kini human giigo ang maong dakbayan sa usa ka kusog nga magnitude 7.8 nga lindol niadtong buntag sa Hunyo 8, 2026, nga nagdala og dinalian nga panginahanglan sa humanitarian aid.
Gipangulohan ni Provincial Board Member Red Duterte ang maong resolusyon, nga dinalian usab nga gisertipikahan ni Cebu Governor Pam Baricuatro pinaagi sa usa ka sulat ngadto sa Sanggunian aron mapadali ang pagpasar niini.
Sa iyang bahin, gipahatag ni PB Duterte nga gawas sa Gensan, kinahanglan usab nga ilhon ang uban pang mga dapit nga naapektuhan sa kalamidad aron madunolan og daling tabang.
Samtang sa eksklusibong pakighinabi sa Bombo Radyo Cebu Newsteam kang Ainjelez dela Torre-Orong, ang Cebu Provincial Public Information Officer, nga gawas sa 10 milyones pesos nga tabang pinansyal, nagmando usab si Gov. Baricuatro nga patawagan ang Disaster Risk Reduction and Management Office (DRRMO) sa Gensan ug sa kasikbit nga Local Government Unit (LGU), aron makakuha og update sa mga panghitabo didto, ug ingun man masayran kung asang luna-a pwede tabangan.
Gitino usab niini nga kung hingpit nang masuta kung unsa ang kinatibuk-ang status sa apektadong dapit, giklaro ni Orong nga andam na ang mga DRRMO sa Probinsya sa Sugbo nga mopadala og team.
Dugang pa niya, gapahibalo usab si Dr. Elisse Nicole “Nikki” Catalan nga aduna nasay medical team nga mamahimong ipadala ug andam nga motabang.
Gikanayon usab ni Orong nga nagmando na usab si Gov. Baricuatro sa pagpadala og food packs, emergency kits, hygiene kits, ug ingun man sleeping kits nga mapadala sa Gensan.
Kahinumduman nga sa dihang naigo sa magnitude 6.9 nga lindol ang Bogo City ug uban pang bahin sa amihanang Sugbo niadtong Septiyembre 30, 2025, mitunol usab og hinabang ang General Santos City ug yanong nipaambit og ₱8 milyones nga hinabang ngadto sa Kagamhanan sa Probinsya sa Sugbo.
