Gipanghimakak ni Bise Presidente Sara Duterte ang mga taho sa destabilisasyon batok sa administrasyon, nga nag-ingon nga ang kasamtangang gobyerno “insecure” sa tingog sa katawhan.
Sa press briefing sa Zamboanga, ang Bise Presidente niingon nga walay destabilisasyon nga nahitabo ug istorya lang kini.
Matod niya nga gigamit sa administrasyon ang pulong destabilization tungod kay sila mismo gikulbaan.
Gihimakak usab niya ang mga huhungihong nga adunay mga tigom aron pagpukan sa gobyerno, apan si VP Sara niingon nga kon aduna man, ang Makabayan bloc, nga giingong gustong moilog sa gahum.
Mitubag si Bayan Chairperson Teodoro Casiño, nga nag-ingon nga kadtong nangita og tulubagon sa korapsyon sayop nga gitawag og “destabilizers.”
Iyang gitataw nga ang tumong sa Makabayan bloc mao ang pag-usab sa kurakot nga sistema ug dili ang paglumpag niini.
Kahinumdoman nga ang isyu sa destabilisasyon naggumikan sa dagkong mga protesta batok sa korapsyon niadtong Septiyembre 21, diin nitumaw ang tensiyon tali sa mga rallyista ug kapulisan duol sa Malacañang.
