Giila sa Office of the Civil Defense–Central Visayas (OCD-7) ang tinuig nga blood donation drive sa Bombo Radyo Philippines nga usa ka dakong tabang sa pagpangandam batok sa mga katalagman.
Matod ni Joel Erestain, Regional Director sa OCD-7, nga ang “DUGONG BOMBO: A Little Pain, A Life to Gain” Nationwide Blood Donation Drive dili lang usa ka kalihokan sa pagtabang, kondili usa usab ka inisyatibo nga nakaluwas ug nagpadayon sa pagluwas sa daghang kinabuhi.
Gipasabot niini nga ang maong kalihokan adunay dako nga kontribusyon sa Philippine Red Cross, ilabi na sa pag-andam sa reserbang dugo nga magamit sa panahon sa emerhensiya ug kalamidad.
Gihatagan og gibug-aton ni Erestain nga human sa sunod-sunod nga mga linog sa Cebu, dako kaayo og papel ang mga bloodletting activities sama sa Dugong Bombo, labi na nga nag-andam karon ang ahensya sa posibilidad sa “The Big One.”
Iyang giingon nga kung moabot man ang maong katalagman, kinahanglan nga adunay igo nga suplay sa dugo alang sa mga biktima.
Giawhag usab niini ang katawhan nga mosalmot sa Dugong Bombo karong Nobyembre 15, 2025, nga ipahigayon dinhi sa Sugbo sa 3rd Floor Cinema Hallway B, SM City Cebu, Mabolo, Cebu City.
Gisuportahan ang maong aktibidad sa nagkadaiyang ahensya sa gobyerno ug pribadong sektor, isip timaan sa padayong panaghiusa ug pagtinabangay alang sa kaluwasan sa katawhan.
