Gibasura sa Commission on Elections (COMELEC) ang petition for disqualification batok kang Cebu City Councilor Joel C. Garganera kinsa nakadaog sa iyang ikaupat nga sunod-sunod nga termino sa 2025 election, diin ang duha ka rason mao ang improper remedy and lack of merit.
Kahinomdoman nga kaniadtong Oktobre 17, 2025, nipagawas og resolusyon sa unang dibisyon ang COMELEC diin ang Election Body nihukom nga si Garganera wala makaserbisyo sa iyang ikaduhang termino sa tuig 2019 hangtod 2022.
Samtang, gikonsiderar sa COMELEC ang pagkalangan ni Garganera sa pag-asumir sa katungdanan alang sa ikaduhang termino sa Hulyo 17, 2019 imbes sa Hunyo 30, 2019, diin usa kini ka involuntary severance from office ug an interruption of continuity of service, busa, ang COMELEC nagdesisyon nga si Garganera kuwalipikado nga modagan alang sa 2025 nga piniliay ug magpabilin sa pwesto sa City Council nga iyang nadaog.
Sa pikas bahin, gitataw ni Garganera nga wala siyay kulba sa lakang nga gipahamtang sa COMELEC kay kabalo sa iyahang nahimong binuhatan.
Gawas niana, mas kompyansa siya tungod kay wala siya pasgdi ug inabagan usab siya sa iyang anak nga babae kinsa usa ka abogada usab, nga naghatag kaniya og kasiguradohan nga makalingkawas siya sa maong hisgutanan nga nagsubay sa legal nga proseso.
Si Garganera nagsilbi na karon sa iyang ikaupat nga termino nga walay hunong gikan sa tuig 2016-2019; 2019-2022; 2022-2025; 2025-2028.
