Nisumiter og suwat ngadto sa Office of the Ombudsman ang grupong TINDIG Pilipinas partikular kang Ombudsman Jesus Crispin ‘Boying’ Remulla.
Sa suwat nga gipadala sa maong opisyal, gitumong nila nga awhagon siya nga mohimo og aksyon o imbestigahon ang mga pasangil nga naa sa articles of impeachment nga gipasaka batok kang Bise Presidente Sara Duterte.
Kahinumduman nga wala madayon ang gipaabot nga ‘impeachment trial’ batok sa ikaduhang president sa dihang gi-archive ang articles of impeachment sa pamunuan ni kanhi Senate President Francis “Chiz” Escudero.
Kahinumduman usab nga gideklarar kini nga ‘unconstitutional’ o dili subay sa konstitusyon sa dihang ang Korte Suprema mipagawas sa ilang desisyon bahin sa impeachment nga nasukad sa sipyat nga serye sa panghitabo.
Busa, ang grupo nga TINDIG Pilipinas, lakip ang mga citizen-complainants, nidangop na karon sa bag-ong gitudlo nga Ombudsman aron mangayo og dinaliang imbestigasyon sa mga akusasypm.
Gikan niini, ang grupo niinsistir nga dili ibaliwala ang isyu ug alegasyon nga giatubang ni Bise Presidente Sara Duterte.
Busa, si Ombudsman Remulla mismo nipasalig nga dili niya ibaliwala ang mga pasangil o isyu sa pangurakot nga gipasaka batok kang Bise Presidente Duterte.
Nunot sa pagsumite sa suwat sa TINDIG Pilipinas kagahapong adlawa ngadto sa iyang buhatan, niingon siya nga sugdan na niya ang fact-finding.
Sa suwat nga gipadala kaniya sa grupo, ilang giawhag ang Ombudsman nga sugdan dayon ang imbestigasyon sa ikaduhang presidente, ilabi na kalabot sa ‘articles of impeachment’ nga gipasaka batok kaniya.
Ang confidential ug intelligence funds maoy usa sa gusto nilang imbestigahon o i-review sa Ombudsman, apan giangkon ni Remulla nga kinahanglan pa niyang basahon ug tukion pag-ayo ang maong suwat.
Hinuon, gipaambit ni Ombudsman Remulla nga iyang tagdon ang ‘articles of impeachment’ isip giya sa pagpahigayon og fact-finding.
