Mikabat na sa 60 ang ihap sa mga giila sa Armed Forces of the Philippines ang non-existent o mga ghost flood control projects.
Kini kabahin sa tabang sa Armed Forces sa Department of Public Works and Highways (DPWH) nga nag-una nga nagpahigayon og inspeksyon ug beripikasyon sa maong mga proyekto, basi sa available public records.
Sumala ni AFP Chief of Staff Romeo Brawner Jr., gihatagan sila sa aktuwal nga mga koordinasyon kung asa unta tukuron ang mga proyekto, ug kini ang gisubay sa mga sundalo.
Ingon man nga naka-assess na ang AFP og walo ka libo (8,000) ka mga flood control projects.
Sumala ni Gen. Brawner, ang gidaghanon mahimong modaghan samtang ang mga hugna ug inspeksyon sa lainlaing mga lokasyon nagpadayon pa.
Nasayran usab nga ang AFP gihatagan og hangtod sa 16,000 ka mga proyekto aron susihon.
Giklaro sa heneral nga ang papel sa AFP limitado lamang sa pagtino kung ang usa ka proyekto gitukod ba sa usa ka lugar, uban sa tabang sa mga koordinasyon nga nakuha.
