Opisyal nang gitudlo si Mario Búcaro isip bag-ong chief executive officer (CEO) sa Miss Universe Organization (MUO).
Si Búcaro ang kanhi vice president for international relations sa MUO. Usa usab siya ka diplomat ug public servant, human siya nagserbisyo isip Ambassador sa Guatemala sa Israel, Mexico, Bulgaria ug Cyprus. Bag-ohay lang siyang nagserbisyo isip Minister of Foreign Affairs sa Guatemala.
Ang pagtudlo ni Búcaro nahitabo pipila lang ka semana sa wala pa ang gipaabot nga pagsugod sa prestihiyosong Miss Universe 2025 pageant nga ipahigayon sa Nobyembre 21 sa Bangkok, Thailand.
Sumala sa MUO, ang liderato sa bag-ong CEO mag-focus sa pagpalig-on sa internasyonal nga kolaborasyon, pagpalapad sa presensya sa organisasyon sa Amerika, Europe, Asia, Caribbean ug Africa, ug pagpalambo pa sa mga kasinatian sa mga kandidato sa Miss Universe samtang nagpalig-on sa integridad ug patas nga pagtagad.
Ilisan ni Búcaro ang Thai media tycoon nga si Anne Jakrajutatip isip CEO human siya mi-resign niadtong Hunyo 20 human sa reorganisasyon sa board of directors sa Thai Media company nga JKN Global Group.
Sa usa ka pamahayag, ang organisasyon nagpahayag sa ilang kinasingkasing nga pasalamat sa negosyanteng Thai tungod sa iyang “visionary leadership” ug dedikasyon, nga nakapausbaw pag-ayo sa presensya sa MUO sa tibuok kalibutan ug sa pasalig niini sa diversity ug inclusion.
Ang mga kontribusyon ni Jakrajutatip sa organisasyon nagbilin ug usa ka malungtarong kabilin nga magpadayon sa pagdasig sa misyon sa organisasyon samtang siya nag-focus sa iyang pamilya. | via Bombo Ken Apor
