PROVINCE OF CEBU- Naghiusa ang tibuok pwersa sa kapulisan ug mga ahensya sa seguridad sa probinsiya sa Sugbo alang sa Ligtas Undas 2025, ubos sa tema nga “Pagtuo. Serbisyo. Kaligtasan.”
Gipangulohan sa Cebu Police Provincial Office, ubos ni Police Colonel Abubakar Udang Mangelen Jr., Provincial Director, gipahigayon ang send-off ceremony niadtong Oktubre 28, 2025, sa Cebu PPO Multi-Purpose Grounds, diin si Governor Pamela S. Baricuatro mao ang Guest of Honor ug Speaker.
Sa iyang mensahe, mipasidungog si Col. Mangelen sa tanang kauban nga ahensya, lakip na ang AFP, BFP, BJMP, PCG, PDEA, PDRRMO, ug mga force multipliers ug volunteers, sa ilang walay puas nga suporta ug panaghiusa.
Gipasabot sa opisyal nga ang Undas dili lamang kalihokan sa kaluwasan, kondili usa ka misyon sa pagtuo ug kaluoy.
Sa laing bahin, si Gov. Baricuatro, mipadayag sa iyang pasalamat ug pagdani sa tanang uniformed personnel ug responders sa ilang kaisog ug dedikasyon.
Iyang gipasiugda nga ang presensya sa mga otoridad maoy garantiya sa katawhan nga sila luwas ug protektado.
Ang maong seremonya nagsilbing pamatuod sa panaghiusa ug kaandam sa tanang ahensya aron masiguro ang kalinaw ug kahapsay sa pagsaulog sa Undas 2025.
