BOGO CITY,CEBU- Mapasalamaton si Provincial Board Member Celestino “Tining” Martinez nga bisan pa sa grabeng epekto sa Bagyong Tino, wala’y natala nga casualty sa dakbayan sa Bogo.
Matod ni Martinez, gagmay ra ang mga insidente nga natala sa amihanang bahin sa Sugbo.
Kasagaran niini mao ang mga natumbang kahoy, pagkawala sa komunikasyon, ug power interruption.
Dugang pa niya, hinay-hinay na nga nabalik ang suplay sa kuryente sa pipila ka lugar sa dakbayan.
Nagpasalamat usab si Martinez sa kooperasyon sa mga residente ug sa mga miyembro sa Disaster Risk Reduction and Management Office (DRRMO) nga nagtinabangay sa Local Government Units (LGUs) aron mas hapsay ang dagan sa mga operasyon sa panahon sa kalamidad.
Nanghinaot siya nga makat-on ang katawhan gikan sa kasinatian aron mas andam pa sa umaabot nga mga kalamidad.
Kahinumdoman nga gipailalom sa State of Calamity ang probinsya sa Sugbo human makita ang lapad nga kadaot nga gidala sa Bagyong Tino niadtong Nobyembre 4, 2025.
Subay niini, gipirmahan ni Gobernador Pamela Baricuatro ang Executive Order No. 68 niadtong Martes sa gabii, human sa pag-igo sa bagyo nga mikalas ug daghang kinabuhi ug nakaapekto sa daghang mga lungsod sa lalawigan.
