Kapin sa 70,000 pa ka mga panimalay ang wala pay suplay sa tubig, gumikan sa mga naguba nga water pipelines, mao kini ang gibutyag sa Metropolitan Cebu Water District.
Matud sa Information officer sa MCWD nga si Minerva Gerodias, nga ang Jaclupan Facility niini sa Dakbayan sa Talisay usa sa mga tinubdan nga labing naapektuhan, ug nagpabilin nga wala’y koneksyon (30,000 cubic meters) tungod sa nadaot nga 800mm nga transmission line nga nagdala sa raw water ngadto sa Tisa reservoir.
Matod pa ni Gerodias, nga ang ilang mga team padayon nga nagtrabaho 24/7 aron ayohon ug rehabilitahon ang mga nadaot nga pipeline, pumping station, ug mga pasilidad sa produksiyon sa tubig sa tibuok Metro Cebu.
Gipasalig usab sa ahensya sa mga konsumidor nga ang mga paningkamot nagpadayon aron makab-ot ang hingpit nga pagpahiuli ug pagpalig-on sa distribusyon sa tubig sa mga apektadong lugar.
Sapagkakaron, ang kasamtangang produksiyon sa MCWD anaa sa 200,500 cubic meters kada adlaw gikan sa produksiyon nga 275,000 nga nagsuplay sa kadaghanan sa mga nagkadaiyang dakbayan sa Cebu, Mandaue, Lapu-Lapu, ug Talisay, ug pipila ka bahin sa amihanang Cebu.
Kahinumdoman nga nagbilin ang Bagyong Tino, ug grabeng kadaot niadtong Nobyembre 4, sa pipila ka mga lugar sa Cebu, hinungdan nga walay tubig human sa kusog nga ulan ug pagbaha sa nadaot nga mga main lines ug mga pasilidad nga nagsalig sa kuryente.
Sa pikas bahin, gihimug-atan usab ni Gerodias, nga dili angay nga mabalaka ang mga konsumidor sa bayrunon gumikan kay dili pabayran sa MCWD ang ilang rehabilation process ug isuspenso usab nila ang disconnection sa mga tubig aron sa pagkonsiderar sa mga nabiktima sa Bagyong Tino.
