Gidayeg sa United Nations (UN) ang pagpangandam sa Pilipinas sa wala pa moigo ang Super Typhoon Uwan.
Sumala sa UN Resident and Humanitarian Coordinator nga si Arnaud Peral, ang episyente nga pagpangandam, pre-emptive evacuations ug uban pang tukma sa panahon nga mga tubag walay duhaduha nga nakaluwas sa daghang kinabuhi.
Gihisgutan sa UN Office for the Coordination of Humanitarian Affairs ang mga paningkamot sa pagtubag ug pagbangon sa gobyerno sa Pilipinas human sa giisip nga usa sa pinakadako nga pre-emptive evacuations nga natala sa kasaysayan sa nasud.
Kahinumduman nga hangtod sa 1.3-milyones nga mga indibidwal ang gipabakwit sa 13 sa 18 ka mga rehiyon sa nasud sa wala pa mo-landfall ang Super Typhoon.
Samtang, ang UN nagpasidaan nga mas kusog nga mga bagyo sama sa Uwan ang mahimong masinati samtang ang kadagatan nga naglibot sa Pilipinas moinit tungod sa krisis sa klima.
Busa, gipasiugda sa UN Secretary-General deputy spokesperson nga si Farhan Haq nga ang hiniusa nga pagpangandam alang sa mga epekto sa mga katalagman hinungdanon kaayo.
