Gihangyo nila ni kanhi President Rodrigo Roa Duterte ug Sen. Bato dela Rosa ang Korte Suprema nga hunungon ang pagpatuman sa posibleng warrant of arrest gikan sa International Criminal Court (ICC).
Pinaagi sa ilang abogado nga si Atty. Israelito Torreon, nagsumite sila og manifestation ug nangayo og Temporary Restraining Order (TRO) aron mapugngan ang mga awtoridad sa pagpang-aresto o pagpangayo sa ilang pagsurender base sa mga mando sa ICC.
Lakip sa petisyon ang hangyo nga pahunongon ang implementasyon sa ICC warrant, red notice, ug surrender request batok sa duha ka opisyal.
Gihangyo usab nga mandoan sa Korte Suprema ang Department of Justice (DOJ) ug Department of Foreign Affairs (DFA) nga magsumite og pahayag aron klaruhon kung tinuod bang adunay gipagawas nga warrant of arrest gikan sa ICC.
Ang ICC nagpadayon sa imbestigasyon kalabot sa gubat kontra droga sa administrasyon ni Duterte, diin gipasanginlan kini og mga krimen batok sa katawhan.
Bisan pa nga niatras na ang Pilipinas sa ICC kaniadtong 2019, giingon sa korte nga naa gihapon silay hurisdiksiyon sa mga panghitabo nga nahitabo samtang miyembro pa ang Pilipinas.
