Gilaumang adunay laslas sa presyo sa produktong gasolina karong samanaha samtang gipanglantawan nga musaka ang presyo sa diesel ug kerosene sumala sa Department of Energy (DOE).
Nagsubay kini sa trade monitoring sa Means of Platts Singapore diin sumala pa ni DOE Oil Industry Management Bureau Assistant Director Rodela Romero nga sa gasolina kay ang laslas sa presyo posible sa P0.20-P0.40 per liter samtang sa diesel kay musaka sa P0.40-P0.60 per liter ug kerosene kay musaka sa P1.10-P1.30 per liter.
Gipasabot ni Romero nga ang pagbag-o sa presyo kay mahitungod gikan sa global oil supply and demand lakip na ang padayong panagbangi sa mga kanasuran sa kalibutan sama sa Russia ug Ukraine.
Dugang pa niini nga ang rollback sa gasolina naggikan sa oversupply sa Organization of the Petroleum Exporting Countries and allies (OPEC+) ug ang paghuyang sa lokal nga ekonomiya.
Ipatuman ang pag-usab sa presyo sa produktong lana sa adlawng Martes, Nobyembre 25.
