Lapu-lapu City Police Office, gipahingusgan pa ang kampanya batok ilegal nga droga

Gipahingusgan pa sa kapulisan sa dakbayan sa Lapu-Lapu City Police Office ang ilang kampanya batok sa iligal nga droga.

Kini ang gipaambit ni PCol. Antonietto Cañete, Officer-in Charge sa LLCPO aron sa pagmintinar sa kalinaw ug kahapsay sa dakbayan.

Matud niini, kasamtangang wala’y giusab ug gidugang ang bag-ong hepe inay mas gipahugtan lang niini ang mga nakalatid na nga mga programa.

Nipahimangno nalang kini sa iyang mga sakop nga seryosohon ang mga programa sa kapulisan hilabi na ang mga may kalambigitan sa pakigbisog sa krimen.

Gidasig usab niini ang iyang bag-ong gidumalaan nga magkahiusa pinaagi usab sa pakigtambabayong sa ubang ahensya aron hingpit gayud nga makab-ot ug mamentinar ang kalinaw sa dakbayan.