Pormal nga gihangyo sa Department of Social Welfare and Development (DSWD) Region VII ang Cebu City Council nga mopasar og resolusyon nga nagtugot kang Mayor Nestor Archival nga mosulod sa usa ka Memorandum of Agreement (MOA) aron suportahan ang pagpalapad sa Pag-Abot Program sulod sa siyudad.
Atol sa Executive Session niadtong Setyembre 16, 2025, sa ika-17 nga Sangguniang Panlungsod, gipasabot ni DSWD-7 Regional Director Shalaine Marie Lucero, CESO IV, ang sugyot nga himuong pilot expansion area ang Cebu City alang sa Pag-Abot Program, diin ang inisyatibo nagtumong sa paghatag og komprehensibo nga tabang sa mga indibidwal ug pamilya nga nagpuyo sa kadalanan.
Ingon man nga nagsuporta kini sa mga mahuyang nga indibidwal pinaagi sa pagtanyag og:
- Reintegration ug reunification uban sa ilang mga pamilya
- Luwas nga temporaryo nga puy-anan o long-term residential placement
- Suporta sa pagsagop sa mga gibiyaan o gipasagdan nga mga bata
- Usa ka kompleto nga pakete sa mga serbisyo sa social protection
Gikanayon usab ni Lucero nga ang pangunang tumong sa programa mao ang pagpakunhod sa mga risgo sa mga bata, indibidwal, ug pamilya nga nagpuyo sa kadalanan pinaagi sa paghatag og mga interbensyon, mga oportunidad alang sa sosyal nga kalamboan, ug pag-access sa mga importanteng katungod sa usa ka luwas ug masuportahan nga palibot.
Ang programa unang gilunsad sa National Capital Region (NCR) kaniadtong 2023, diin 1,245 ka mga indibidwal ang natabangan ug nadala pauli sa ilang mga probinsya pinaagi sa Balik Probinsya, Bagong Pag-asa Program (BPBPP).
Subay niana, ang Gobyerno sa Dakbayan sa Sugbo, pinaagi sa pagpangu ni Mayor Nestor Archival, nagpadayon kini sa pakigtambayayong sa DSWD-7 aron mapalig-on ang mga inisyatibo sa social welfare ug masiguro ang dignidad nga suporta sa tanang mahuyang ug nameligro nga mga indibidwal sa siyudad.
