Gi-postpone sa Sandiganbayan 5th Division ang pag-isyu sa katapusang desisyon niini sa mosyon nga gisang-at ni Senador Jinggoy Estrada.
Ang mosyon nagtinguha nga tugotan siya nga mobiyahe gawas sa Pilipinas.
Atol sa hearing sa kaso, nga gitambongan ni Estrada pinaagi sa video conference, ang anti-graft court nga nagpagawas ug direktiba.
Gimandoan sa Sandiganbayan si Estrada nga kompletohon ug isumiter sulod sa lima ka adlaw ang tanan nga importanteng dokumento nga gikinahanglan alang sa iyang hangyo sa pagbiyahe.
Kini nga mga dokumento naglakip sa iyang itinerary, nga adunay mga detalye sa iyang mga plano sa pagbiyahe, mga detalye sa iyang mga booking o reserbasyon sa hotel, authority to travel , ug usa ka affidavit of undertaking, diin si Estrada misaad nga motuman sa mga kondisyon sa korte.
Gusto ni Estrada nga mobiyahe paingon sa Japan gikan Disyembre 26 hangtod Disyembre 31.
Human niini, plano usab niya nga moadto sa Norway, Iceland, ug Austria gikan Enero 5 hangtod Enero 15, 2026.
Gisupak kini sa prosekusyon, nga gipasiugda nga ang ngalan ni Estrada nalakip sa Immigration Lookout Bulletin Order.
Ang ngalan sa senador nailhan nga nalambigit sa mga anomaliya nga naglibot sa mga proyekto sa pagkontrol sa baha sa nasud.
