Nagplano ang grupo sa depensa ni kanhi Presidente Rodrigo Duterte nga moapelar pag-usab sa pagpagawas sa kanhi Presidente.
Kini human ang International Criminal Court (ICC) Appeals Chamber misalikway sa hangyo sa kanhi Presidente alang sa temporaryong pagpagawas niadtong Biyernes.
Sumala sa lead counsel ni kanhi Presidente Duterte nga si Nicholas Kaufman, naghulat sila karon sa resulta sa medical evaluation ni Duterte, nga gikatakdang ipagawas sa Disyembre.
Ang medical evaluation mo-assess sa pisikal ug cognitive condition sa kanhi Presidente.
Si Kaufman miingon usab nga ang desisyon sa Appeals Chamber dili wala damha. Miingon siya nga ang ICC Appeals Chamber wala gyud mosuporta sa interim release sa usa ka indibidwal nga giakusahan og mga krimen batok sa katawhan.
Gipadayon sa depensa nga ang 80-anyos nga kanhi Presidente dili na maisip nga “flight risk” ug dili hulga sa mga saksi tungod sa iyang nagkagrabe nga panglawas.
Sumala ni Kaufman, ang resulta sa medical evaluation mahimong kabahin sa ilang bag-ong mosyon alang sa interim release.
Gipasiugda usab sa depensa nga ipadayon nila ang ilang mga paningkamot alang sa pagpagawas sa kanhi Presidente bisan pa sa nangaging mga pagpanghimakak.
