Posibleng mopasaka og kaso ang Bureau of Fire Protection Central Visayas batok sa driver sa usa ka dump truck human midasmag sa usa ka firetruck nga gimaneho sa mga Bombero sa Loboc, Bohol, gahapon, Disyembre 1.
Kini ang gipaambit ni FCSUPT Fred Trajeras Jr., ang regional director sa BFP 7 nga nakig-alayon kaniya ang Chief sa Probinsya kung unsa ang angay buhaton kalabot sa Loboc incident, ug mao kini ang iyang gipaambit.
Sa imbestigasyon sa Loboc Municipal police station nga gikan sa road-flushing operations sa Loboc ang kabomberohan apan sa ilang pagbalik sa ilang fire station nakasugat nila ang dako nga dump truck sa kurbadahon nga bahin sa Barangay Jimilian nga gimaneho ni Marc Leo Lim, 37-anyos.
Tungod sa kakusog sa impact ug kadako sa dump truck, naguba ang atubangan sa fire truck ug napiit ang driver niini nga si Fire Officer 1 Moises Dalagan.
Dali nga nanawag og rescue ang Loboc Fire station sa mga silingan nga lungsod og sa siyudad sa Tagbilaran.
Luwas nga nakuha ang driver gamit ang mga kahimanan sa BFP Tagbilaran City Rescue Team ug gidala dayon sa labing duol nga tambalanan nga padayon pa nga giatiman sa mga doctor.
Sigun sa driver sa dump truck nga nag-malfunction ang steering mechanism sa iyang sakyanan nga maoy hinungdan nga wala na kini makaliko ug mibangga sa gikasugat nga fire truck sa lungsod sa Loboc.
Sa pagkakaron, gipabahilo ni RD Trajeras nga stable na ang duha ka firefighters apan ang driver sa bomber kay nakaangkon og ribcage fracture samtang ang usa niini kay gipaubos sa CT Scan.
Ug kasamtangang gikustodiya sa Loboc Municipal police station ang driver sa dump truck ug giandaman na ang kasong Reckless Imprudence resulting in Damage of Property and Physical Injury.
