Gipahibalo sa kagamhanan sa Dakbayan sa Sugbo nga bayran niini ang mga empleyado sa City Hall para sa mga opisyal nga uniporme nga nabayran apan wala gyud ma-deliver sa miaging administrasyon.
Sigon ni Mayor Nestor Archival, nga ang Human Resource Development Office (HRDO) nag-finalize na og cash refund scheme aron mabayran ang mga trabahante nga gi-deduct og P4,000 gikan sa ilang mga allowance sa sayo pa ning tuiga.
Gipasalig usab ni Archival nga ang kasamtangang administrasyon nagsulbad sa isyu aron mabalik ang pagsalig ug mapanalipdan ang kaayohan sa mga empleyado human ang kontratado nga supplier napakyas sa pagtuman sa maong order.
Kini human nga si Konsehal Pastor “Jun” Alcover Jr. mihatag og privilege speech nga nangutana nganong gi-deduct sa City Hall ang mga bayad sa uniporme gikan sa sweldo sa mga empleyado bisan wala’y bisan usa ka sinina nga nadawat.
Matud ni Alcover, nga sa pagsugod sa 2025, ang mga kwalipikado nga personahe gihatagan og P7,000 nga clothing allowance ubos sa national guidelines.
Gihimug-atan nga ang pagkalangan dili lang makadaot sa moral sa mga empleyado apan nagpataas usab sa mga kabalaka sa accountability, labi na sa mga trabahante kansang mga kontrata wala gi-renew sa tunga-tunga sa tuig ug mahimo na nga wala nay higayon nga makadawat sa mga uniporme o refund.
Giklaro usab ni Archival nga ang procurement nga gihisgutan wala mahitabo ubos sa iyang administrasyon og midugang nga ang gikontrata sa miaging termino napakyas sa paghatud sa mga uniporme, nga nagbilin sa iyang administrasyon sa buluhaton sa pagsulbad sa problema.
Gilauman usab sa kagamhanan sa dakbayan nga mahuman dayon ang proseso sa pagrefund.
